Мeсяца маиа в 27 день (в лeто 7117 (1609 г.) – Ред.) паки в Сопeгиных табарeх и Лисовского бысть шум велик, играюще во многиа игры и до полудьни. С полудни же начашя Литовскиа люди подъeжати под град, сматряюще стeн и часто позирающе. Тако же начашя готовити мeста, гдe быти пушкам их и пищалем; и скачюще на бахматeх, машуще мечи своими на град, яко грозяще.
К вечеру же начашя скакати конные многие люди, и з знамены по всeм полям Клемяньтeевским. По сем же и Сопeга вышел со многими полки вооруженными, и паки скрышяся в табары своя. Оставшее же ся Троицкое воинство, видяще на град лукавое позирание, уразумeшя лютый совeт их к пролитию крови и непьщеваху быти приступу.
И тако готовящеся на брань, бeша бо мали числом суще; и готовяху на стeнах вар с калом, смолу, камение и прочее, иже к тому времени пристрояюще, и подошевной бой очистишя. И егда бысть вечер уже, окааннии же Литовские люди и Руские измeнники лукавствующе, хотяще к стeнам градным приити тайно и ползающе, аки змиа по земли молком, везяху приступныя козни: щиты рубленые, и лeстницы, и туры, и стeнобитныя хитрости. Градстии же людие вси взыдошя на стeны, мужеска полу и женска, и, такожде западше, ждаху приступу. И абие с Красныя горы возгремeшя из огненово верховаго наряду; и тако воскричавше, все множество Литовских людей и Рус ких измeнников и устремишяся на град со всeх стран с лeствицы, и щиты, и с тарасы, и со иными козньми стeнобитными. И заиграшя во многия игры, начаша приступати ко граду всeми силами, всякими дeлы и хитростьми: мняху бо окааннии во един час похитити град; вeдяще же во градe зeло мало людей, и тии суть немощни, и сего ради крeпце належаху на град.
Но благодатию Божиею подкрeпляемо Троицкое воинство бияхуся с стeн градных крeпко и мужествено. Литва же тщащеся вскорe на град взыти и придвигнушя щиты на колесeх и лeствицы многия, и нуждахуся силою приставити и взыти на стeны; христолюбивое же воинство и вси людие градстии не дающе им щитов и тарасов придвигнути и лeствиц присланивати, бьюще ис подошевново бою изо многих пушек и пищалей, и в окна колюще, и камение мещуще, и вар с калом льюще; и сeру, и смолу зажигающе метаху, и известью засыпающе скверныя их очеса; и тако бьющеся чрез всю нощь. Архимарит же Иасаф со всeм освященным собором вниде в храм Пресвятыя Троица, молящеся Всещедрому в Троицы славимому Богу и Пречистей Богородици и великим чюдотворцом Сергию и Никону о избавлении града и о помощи над враги. Егда же бысть день, видяще окаании, яко не успeшя ничто же, но паче своих множество изгубишя, начашя с студом отступати от града. Градстии же людие вскорe отворишя град, овии же, с стeн скочивше, учинишя выласку на оставшихся ту Литовских людей у стeнобитных хитростей своих; инии же во рвeх бродяще и не могуще изыти.
И тако тeх многих побили, а живых взяли панов и Руских измeнников 30 человeк. И повелeшя им в жерновы играти; и тако работающе на братию и на все Троицкое воинство и до отшествиа врагов от града. И милостию Пребезначальныя Троица и заступлением Пречистыа Богоматере и молитв ради великих чюдотворцов Сергиа и Никона побишя тогда множество приступных людей, и тарасы их, и щиты, и лeствицы, и прочия козни вземше, во град внесошя. Сами же вси здравы отшедше, яко побeдители над враги показашяся.
Сказание Авраамия Палицына, глава 44
Источник: Свято-Троицкая Сергиева Лавра
[1] — За столетия на территории Свято-Троицкой Сергиевой Лавры сложился уникальный ансамбль разновременных построек, включающий более пятидесяти зданий и сооружений.
В юго-западной части монастыря находится белокаменный Троицкий собор (1422-1423), поставленный на месте первого деревянного храма XIV века. Именно вокруг него происходило формирование монастырского ансамбля. К востоку от собора в 1476 году псковскими мастерами была возведена кирпичная церковь-звонница во имя Сошествия святого Духа на апостолов. подробнее...