Троицкие листки № 542. Праздник Введения во храм Пресвятой Владычицы нашей Богородицы в церковных песнопениях

logo

Листок второй

Величаем Тя, Пресвятая Дево, Богоизбранная Отроковице, и чтем еже в храм Господень вхождение Твое.

Днесь Боговместимый храм, Богородица, в храм Господень приводится, и Захария Сию приемлет; днесь Святая-святых радуются, и лик Ангельский таинственно торжествует, с нимиже и мы празднующе днесь с Гавриилом возопиим: радуйся, Благодатная! Господь с Тобою, имеяй велию милость!

Троицкие листки № 542. Праздник Введения во храм Пресвятой Владычицы нашей Богородицы в церковных песнопениях

Пржде зачатия, Чистая, освятилася еси Богу, и рождшися на земли, дар принеслася еси ныне Ему, исполняющи отческое (родительское) обещание. В Божественнем же храме, яко сущи (Сама будучи) Божественный Храм, от младенчества чист, со свещами светлыми, отдана бывши, явилася еси приятелище (вместилище) Неприступнаго и Божественнаго Света. Велико воистинну пред¬шествие Твое, едина Богоневесто и Приснодево!

Родителие божественнии Тя, Божию Родительницу хотящу быти, вводят воспитатися во Святая-святых, исполняют обещание молитвы, еюже моляхуся (о Тебе), Пречистая.

Совет предвечный (о нашем спасении) предвечнаго Бога нашего во исполнение грядет, предгрядущей Ти воспитатися во Святая-святых, в жилище Слова, Отроковице всенепорочная.

Странно (досточудно) Твое зачатие, странно Твое и рождество, странно Твое происхождение, Дево, еже внутрь святилища введение; странна и преславна вся (жизнь) Твоя, превосходящая слово и помышление, Пречистая.

Священнии языцы (пророческие) провозвестиша Тебе, Чистая, быти село (жилищем) Невместимаго Естества; сего ради Тя лицы (лики) девственнии провождают, свещи носяще, во Святая.

Играют (ликуют) Ангельская воинства и всех человек множество, и пред лицем Твоим, Пречистая, предтекут днесь свещеносицы, зовуще (воспевая) величествия Твоя в дому Божии.

Ужасошася всяческая (все создания изумились) в честнем вхождении Твоем: Ты бо, неискусобрачная Дево, внутрь вошла еси в храм Божий, якоже честнейший Храм, всем воспевающим Тя мир подавающая.

Плотию трилетствующи, Богородица Господу приносится, Захария же священник Божий, прием Сию радуяся, во храм возложи (вселил).

Бывши (Сама) храм и палата превышши небес, Пречистая, в храм Божий возложилася (вселилася) еси, Тому (Самому Богу) уготоватися в Божественное жилище пришествия Его.

Песнопоя Тебе, провозглашаше Давид, глаголя (именуя) Тя дщерь Цареву, видев Тя красотою добродетелей упещрену (пре- украшенную), предстоящую одесную Бога, темже (посему) пророчествуя вопияше: истинно выпили всех еси, Дево Чистая!

Да веселятся праотцы днесь, Владычице, и да радуется рождшая Тя со отцем Твоим, яко плод их Господу приносится.

Доброту души Твоея, Пречистая, зря некогда Захария, верою возопи: Ты еси избавление, Ты еси всех радость, Ты еси воззвание (восстановление) наше, Еюже Невместимый вмещен (доступен) мне явится.

Введоста Тя во внутреннейшее (отделение) храма целомудреннии родителие Твои, Пречистая, воспитатися странно (чудесно) в жилище Христа Бога.

Святая-святых (Сама) сущи, Честная, во храм святый возлюбила еси вселитися, и со Ангелы, Дево, беседующи пребываеши, преславно с небесе хлеб приемлющи, Питательнице Жизни.

Яко дом благодати сущи, в немже сокровища лежат неизреченнаго Божия строения (промышления), Всечистая, в храме причастилася еси нетленныя сладости.

По рождестве Твоем, Богоневесто Владычице, пришла еси в храм Господень воспитатися во Святая-святых, яко освященна; тогда и Говриил послан бысть к Тебе, Всенепорочней, пищу Тебе принося: небесная вся удивишася зряще Духа Святаго в Тя всельшася. Темже, Пречистая и Нескверная, Яже на небеси и на земли славима, Мати Божия, спаси род наш!

Святая-святых (Сама), Богородице, сущи, достойно приведена была еси жити во Святая, яко одушевлен Господень кивот и Святаго Духа истинно вместилище Божественное, Дево Мати; темже вселился в Тя Иже Отцу Единородный и Святому Духу Соестественный Твой Сын неискусомужно (безсеменно), обоготворив все человечество.

Ангеловою рукою, во Святая-святых, пищею питает Тя, Дево, Творец всех Сын Твой, Владычице Чистая, являя миру Твое величествие пребольшее.

Всю Тебе освяти Дух Святый, внурь храма пребывающу и питаему пищею небесною, Невесто Отча прекрасная; сего ради была еси и Слова Родительница.

Прозябе иногда жезл Ааронов, прообразующий Божественное рождество (рождение Бога от Тебя),Чистая: яко безсеменно зачнеши, и нетленна пребудеши, и по рождестве девствующи явишися, Младенца питающи — всех Бога.

Повинуяся Рождеству Твоему (Рожденному от Тебя) Всечистая, яко Творцу и Богу, небо и земля и преисподняя, и всяк язык земных исповедает, яко Господь явися, Спас душ наших.

Яко пресветлую имущи доброту душевныя чистоты, Богородице Чистая, благодатию же Божиею исполняема с небесе, светом присносущным всегда просвещаеши с веселием вопиющая: истинно вышши всех еси, Дево Чистая!

Ты — пророков проповедание, апостолов слава, и мучеников похвала, и всех земнородных обновление, Дево Мати Божия: Тобою бо Богу примирихомся. Темже чтим Твое в храм Господень вхождение, и со Ангелом вси песненно — радуйся — Тебе, Пречистая, вопием, Твоими молитвами спасаемии.

Чудо Твое, Богородице Чистая, прелетает силу словес; тело бо в Тебе поразумеваю, паче слова, течения греховнаго чуждо; темже благодарственно вопию Ти: истинно вышши всех еси, Дево Чистая!

О, паче ума чудес Твоих, Всечистая: странное Твое рождество есть, странен образ возращения (воспитания) Твоего: странна и преславна вся (жизнь) Твоя, Богоневесто, и человеки несказанна.

Зря благодать неизреченных Божиих и Божественных тайн, в Деве являемую и исполняему явственно, радуюся и недоумеюся разумети образ странный и неизреченный: како Избранная, Чистая едина явися паче всея твари видимыя и разумеваемыя? Темже восхвалити хотя Сию, ужасаюся зело умом же и словом; обаче дерзая проповедаю и величаю: Сия есть селение небесное.

Подаеши души моей Твою тишину дарований, Богородице, точащи (источая) жизнь Тебе чтущим по долгу, Сама защищающи, и покрывающи, и соблюдающи вопити Тебе: истинно вышши всех еси, Дево Чистая!

Просвети, Чистая, души моея очи, рождшая Свет, да не постигнет мя греховная тьма глубочайшая, ниже да покрыет мя глубина отчаяния; но Сама мя спаси и окорми ко пристанищу Божественнаго хотения.

Херувим пребольши и Серафим превышши, и ширши небес явилася еси, Дево, яко вместивши во утробе Невместимаго всеми и рождши несказанно Бога нашего, Егоже моли прилежно о нас.

Святых Святая и Богомати Марие, молитвами Твоими, Чистая, свободи ны от сетей вражиих и всякия ереси и скорби, верою покланяющияся образу святаго Твоего зрака.

Под Твое благоутробие прибегающия верою и покланяющияся благочестно Сыну Твоему, Дево Богородительнице, яко Богу и Господу мира молимся, избавити от тли и бед и всяческих искушений.



Источник: Свято-Троицкая Сергиева Лавра




Добавить комментарий

Ваш e-mail не будет опубликован. Обязательные поля помечены *