Троицкие листки № 502. Славословия крестившемуся Господу

 Троицкие листки № 502. Славословия крестившемуся Господу

Крещение Господне



Пришел еси, Господи, на струи (Иорданския) чего ради? кое очищение хотя? Кую скверну отмыти ищяй, Преблагий? Пою Твое снисхождение, еже паче ума, Слове, за милосердие. 

Поток еси пищный (сладостный), иже моря и источники Соделавый, и како на воды восходиши? Что омыти ищеши, иже всех омовение и очищение песнословящих Тя, Христе, во веки? 
Пока Иисус мой очищается во Иордане, паче же очищает грехи наша: грядет бо воистинну на крещение, омыти хотя Адамово рукописание, и рече ко Иоанну: гряди, послужи, о Крестителю, таинства страннаго главизне (началу), гряди, простри руку твою скоро и прикоснися верху стершаго змиеву главу и отверзшаго рай, егоже затвори преступление лестию змиевою, вкушением древа иногда. 
Ко гласу вопиющаго в пустыни уготовайте путь Господень — пришел еси, Господи, зрак рабий (образ раба) приим, крещения прося, не ведый греха. Видиша Тя воды — и убояшася; трепетен бысть Предтеча и возопи глаголя: како просветит светильник Света? Како руку положит раб на Владыку? Освяти мене и воды, Спасе, вземляй мира грех! 
Невидимый Боже, Непостижимый Слове! Родился еси от Отца паче естества и слова, паки же в последняя от Девы, не изменив еже бе; грядеши и во струях Иорданских ныне креститися плотию, благоволивый спасти, яко Бог, род человеческий. 
Ты, Сын Отца пребезначальнаго сый, к сыну Захариину смиренно приходиши, Благоутробне, крещения прося, яко да благодатию сыны Божия сотвориши ны. 
Явился еси в мир, Иже мир сотворивый, да просветиши во тьме седящия, Человеколюбче, слава Тебе. 
Дивится всяка душа, помышляющи Твое, Слове, страшное смотрение; како, наздати вся хотя, грядеши внити в речныя струи обнажен, Иже светом одеваяйся. 
Ужасом содержится небо и Ангельская воинства, видяще Тя, Христе, раболепно идуща к Твоему рабу и просяща крещения. 
Высота неизреченна и глубина неизмерна есть, Владыко, смотрения Твоего, всяко преходя ума постижение, како водою и всесвятым Духом земныя очищаеши? 
Рукама создавый, Христе, человека, под руку Предтечеву подклоняешися, яко Человек смиряяся, яко да возвысиши мя, древле смирившася и погибша. Слава славному и страшному строению Твоему. 
Яко Человек пришел еси существом, не мечтанием, яко Един посреде всех просяй крещения, Един естеством Неповинный, погребсти бо вины человеческия пришел еси, в водах крещаем. 
Яко Человек, на реку пришел еси, Христе Царю, и рабское крещение прияти тщишися, Блаже, от Предтечеву руку, грех ради наших, Человеколюбче.
  
Господи, аще и Иоанну предстал еси на Иордане яко Человек, но не отступил еси от Престола со Отцем сидяй, и крещся нас ради, мир свободил еси от работы чуждаго, яко Щедр и Человеколюбец. 
Велие и страшное таинство есть, яко Бог человеком уподобися, и греха отнюдь не ведый яко повинен от Иоанна креститися в реце Иорданстей просит днесь. Благословен явлейся, Боже наш, слава Тебе. 
Величай, душе моя, Единаго от Троицы, преклоншаго выю и крещение приемша. 

Во Иордане крещающуся Тебе, Господи, троическое явися поклонение: Родителев бо глас свидетельствоваше Тебе, возлюбленнаго Тя Сына именуя, и Дух в виде голубине извествоваше словесе утверждение (удостоверял истину слов Бога Отца). Явлейся, Христе Боже, и мир просвещей, слава Тебе! 
Явльшуся Тебе в Иордане, Спасе, и крещшуся Тебе от Предтечи, Христе, возлюбленный Сын свидетельствован был еси, темже и собезначален Отцу явился еси; Дух же Святый на Тя схождаше, Имже и просветившеся, вопием: слава Богу, сущему в Троице! 
Троица Бог наш Себе нам днесь нераздельно яви: ибо Отец явленным свидетельством сродство возгласи; Дух же голубиным образом сниде с небес; Сын — пречистый верх Свой Предтечи преклони и крещся, человечество от работы избави, яко Человеколюбец. 
Како Тя, Христе, раби Владыку достойно почтим, яко в водах всех нас обновил еси! 
Хвалу велегласно Владыце возслем: прииде, явися, восходит на воды, и обнажается — небо одеваяй облаки и крещается, очищая ны воспевающия: да благословит тварь вся Господа и превозносит во вся веки. 
Цвет Давидов, возсияв из Девы, прииде Христос ко струям Иорданским — грехи праотца омыти водами: ликуй, Адаме! веселися, Ево! Небо да радуется, людие рцем: благословен пришедый, Боже наш, слава Тебе! 
Господи, исполнити хотя яже уставил еси от века, от всея твари служители тайны Твоея приял еси: от Ангел — Гавриила, от человек — Деву, от небес — звезду, и от вод — Иордан, в немже беззаконие мирское потребил еси; Спасе наш, слава Тебе! 
Явльшуся Тебе телом, освятися земля, воды благословишася, небо просветися, род же человеков горькаго мучительства вражия избавися. 
Видеша Тя воды, Боже, видеша Тя воды и убояшася: к Твоей бо славе противозрети Херувими не могут, ниже взирати Серафими, но со страхом предстояще, овии убо носят, овии же славят силу Твою. С ними же, Щедре, возвещаем хвалу Твою, глаголюще: являейся Боже, помилуй нас! 
Грядый с плотию ко Иордану, Господи, креститися хотя в образе человека, Животодавче, да прельстившихся нас, яко благоутробен, всякия козни и сети змиевы избавив просветиши, от Отца свидетельствуем; Божественный же Дух голубиным видом Тебе предста, но всели в души наша Того, Человеколюбче! 

Источник: Свято-Троицкая Сергиева Лавра





Добавить комментарий

Ваш e-mail не будет опубликован. Обязательные поля помечены *